Ўзбекистон Халқ демократик партияси Фарғона вилоят кенгаши томонидан ҳар йили ўтказиб келинаётган мазкур танлов юртимизда олиб борилаётган янгиланиш жараёнларида аёлларнинг фаоллигини оширишга муҳим ҳисса бўлиб қўшилмоқда.
Танловнинг туман босқичида фаол аёллар ўртасида ғолибликни қўлга киритган Ибодатхон Абдусатторова вилоят босқичида ҳам муносиб тарзда иштирок этиб қайтди. Ҳар бир туман ва шаҳарлардан иштирок этган “Ўзбекистон Халқ демократик партиясининг энг фаол аёли – 2019” танлови иштирокчилари орасида у ўзининг ташаббускорлиги, етук сиёсий билимга эгалигини намоён этди ҳамда ҳакамлар ҳайъати эътиборига тушди. Танлов якунида Ибодатхон муносиб иштирок этганлиги учун “Энг ёш фаол аёл” номинацияси ғолибига айланди.
Ибодатхоннинг танлов шартига мувофиқ тайёрлаган самарали лойиҳаси, сиёсий билимдонлиги ва эркин мавзулардаги иштироки учун бундай ғолибликка эришиши бежиз эмас. У тумандаги БАБМда бошланғич техник моделлаштириш тўгараги раҳбари бўлиш билан бирга уй шароитида интенсив тут кўчатларини парваришлаб, пиллачилик соҳасини ривожлантиришга, иш билан банд бўлмаган аёллар бандлигини таъминлашга оз бўлсада ҳисса қўшишни мақсад қилган.
Маҳаммадали ҲОЖИМАТОВ,
“Риштон ҳақиқати” мухбири.
