Турли танлов ва олимпиадаларнинг ўтказиб келиниши иқтидорли ёшларнинг кашф этилишида муҳим аҳамият касб этади. Жорий йилнинг июль ойида Россия Федерациясининг пойтахти Москва шаҳрида 39 та давлат ўртасида ментал арифметика бўйича бўлиб ўтган ҳалқаро олимпиадада туманимиздаги 27-умумтаълим мактабининг 2-синф ўқувчиси, саккиз ёшли Муҳаммадазиз Собиров ўз йўналиши бўйича биринчи ўринни эгаллаб, диплом ва совринни қўлга киритиб, барчани лол қолдирди.
– Ўғлим Муҳаммадазиздаги бу ноёб қобилиятни 5 ёшлигидаёқ сезганман, – деди дадаси Акмалжон. – Дастлаб соат неча бўлганини сўраганимда ҳатто дақиқасигача айтиб берган эди. Ментал арифметика боланинг ҳар томонлама ақлини ривожлантиради, чархлайди. Муҳаммадазиз ўзи 2-синфда, лекин 4-синфда ўқийдиган опасининг математика бўйича масалаларини ҳам ечишда ёрдам беради. У уйда кунига 6-7 соат шу фан билан шуғулланади. Бошқа болаларга ўхшаб унчалик ўйинқароқ эмас.
Стол устидаги совринлар, медаллар ва кубоклар Муҳаммадазизнинг турли нуфузли беллашувларда қўлга киритган ютуқларидан сўзлаб турибди.
Туманимизда билимли, иқтидорли, ўткир зеҳнли ва ноёб истеъдод соҳиби бўлган бундай ёшлар тобора кўпайиб бораётгани, албатта барчамизни қувонтиради.
-Келажакда олим бўлиб, бир нарса ихтиро қилиб одамларга фойда келтириш орзуим, – деди ёш Муҳаммадазиз.
Биз ҳам унинг бу орзуси ижобат бўлишини истаб қоламиз.
Ўз мухбиримиз.
