Оммавий маданият – бу аслида маълум бир мафкурани тарғиб қилувчи кучдир. У маданият ниқоби остида халқларнинг маънавий қадриятларини сўндириш, маънавий заифликни кучайтириш ва енгил-яланг таъсирлар орқали ёшлар онгини заҳарлашга қаратилган.
Унинг айрим салбий оқибатларига қуйидагиларни киритиш мумкин:
✅ Миллий қадрият ва анъаналарнинг аста-секин йўқолиши;
✅ Оилавий муқаддасотларга эътибор сусайиши;
✅ Тарбияга салбий таъсир қилувчи маънавий заҳарларнинг ёшлар орасида кенг тарқалиши;
✅ Ҳурмат, шарм-ҳаё, одоб каби фазилатларнинг сусайиши.
Шу сабабли, “оммавий маданият” таъсирига қарши тура олиш учун ёшларда тўғри маънавий иммунитет шакллантириш жуда муҳимдир.
Миллий қадриятларни асраш ва ёт ғояларга қарши курашиш йўллари
Оилада миллий тарбияни кучайтириш – фарзандларга миллий ғурур ва ўзликни англаш ҳиссини ошириш, уларни эзгуликка йўналтириш.
Таълим тизимида миллий қадриятларга эътибор қаратиш – мактаб ва олийгоҳларда миллий меросимиз, тарихимиз ва маънавий анъаналаримиз ҳақида кенг маълумот бериш.
Миллий маданият ва санъатни тарғиб қилиш – миллий куй-қўшиқлар, фольклор, анъанавий санъат турларини ривожлантириш.
Интернет ва ОАВ орқали тарғибот ишларини олиб бориш – миллий қадриятларимиз ва урф-одатларимизни ёшлар орасида оммалаштириш.
Жамиятда маънавий муҳитни кучайтириш – ёшларни китоб ўқишга, ижодий фаолиятга жалб қилиш, маънавиятга оид турли тадбирларни ташкил этиш.
Миллий қадриятларни асраб-авайлаш ва ёшлар онгини ёт ғоялардан ҳимоя қилиш – бу бизнинг нафақат бурчимиз, балки келажак авлод олдидаги масъулиятимиздир. Ҳар биримиз ўз миллий қадриятларимизга содиқ бўлиб, ёшлар тарбиясига жиддий эътибор қаратсак, жамиятимизда маънавий юксалиш ва барқарорлик таъминланади.
Козимжон Тўхтасинов,
ДИҚнинг Риштон туман бўйича бош мутахассиси
